Liebe Samichlaus, wie gseht de Tagesablauf vo dir und em Schmutzli us?

Euse Tag isch gfüllt mit tolle Begägnige, seg das mit Familiene, mit Chindergärte oder Schuelklasse. Mir verzelled schöni Gschichte über euses Waldhüttli oder de Schmutzli teilt de Chind mit, was sie s’nöchst Jahr chönnd besser mache.

Das stahd alles i sim grosse rote Buech wo er immer bi sich hätt. Somit verlönd mir euses Waldhüttli früeh am Morge und chömmed erscht wieder hai wenns bereits dunkel isch dusse.

Singsch du währenddesse?

Sehr sälte, ich unterhalt mich viel lieber  mit em liebe Schmutzli über euse ufregendi Tag oder über was für Guetzli mir als nächstes bache möchted.

Was für e Erfahrig hesch du bisher mit de Chind gmacht? Sind sie dankbar für d Säckli wo sie bechömmed?

Eusi Begägnige mit de Chind sind jedes Mal es schöns Erlebnis, sigs wenn sie ihri Gedicht vorträged oder eus mit ihrne Musikinstrument öppis vorspieled. Als Belohnig erhalted sie ihres Säckli und es Dankeschön isch eus immer gwüss.

Gits öppis wo dich bedrückt oder du dir wünschisch wo du nöd häsch?

Nei es bedrückt mich sälte öppis, und wenn, denn chann ich mich am Schmutzli avertraue, er isch min treue Begleiter. Ehrlichgseit, bin ich wunschlos glücklich, drum fallt mir jetzt spontan nüt ii. De gueti und sorgsami Umgang mit eusne Mitmensche lihd mir aber sehr am Herze.

Was sind dini lieblings Guetzli? 

De liebi Schmutzli isch en wahre Meister im Guetzli bache, dorum isch das e seeeeehr schwierige Frag, Lah mich churz überlegge… wenn ich mich würklich entscheide müsst, würd ich säge, Zimtstern.. oder doch Mailänderli, schwierig.

Mit wellem Gedicht chammer dis Herz erobere?

Mis Herz chammer mit jedem Gedicht erobere. D’Chind üebed fliessig und träged ihri Gedicht mit so vill Sorgfalt vor, dass es jedes mal mis Herz berüehrt.

Euä Samichlaus

Info

Verein Weihnachten in Zürich

8000 Zürich
Switzerland
mail@weihnachten-zuerich.ch

http://www.weihnachten-zuerich.ch/